Норвегид ‘Pfizer’ болон ‘BioNTech’-ын вакциныг тариулсан 23 хүн нас баржээ
Мэргэжилтнүүд одоогоор үхлийн шалтгаануудыг тодруулах ажлыг эхлүүлээд байгаа бөгөөд 13 хүний цогцост задлан шинжилгээ хийгээд байгаа аж.
Норвегийн Эмийн агентлагийн вебсайтад мэдээлснээр нас барсан иргэд нь бүгд 80-аас дээш насны ахмад настай буюу дархлаа султай иргэд байжээ. Мөн вакцин тариулсан хүмүүс, тэр дундаа ахмад настай иргэдэд үнэхээр гаж нөлөө үзүүлсэн байж болзошгүй гэсэн юм. Тиймээс Норвегийн Эрүүл мэндийн байгууллагууд архаг хууч өвчтэй өндөр настнуудыг “BNT162b2” вакцинаар дархлаажуулах зөвлөмждөө өөрчлөлт оруулсан байна. Гэсэн ч Норвегийн Эмийн агентлагийн хэвлэлийн төлөөлөгч Штайнар Мадсен тус улсын “RK” телевизэд ярилцлага өгөх үеэрээ энэ талаар “Эдгээр хэргүүд түгшүүр төрүүлэхгүй байна.
Ахмад настнуудад сөргөөр нөлөөлдөг цөөн хэдэн хүчин зүйлсийг эс тооцвол вакцин маш бага эрсдэлтэй болох нь тодорхой байгаа. Вакцины ердийн гаж нөлөө өндөр настнуудыг илүү хүнд өвчлүүлэхэд хүргэдэг байж болзошгүй. Эдгээр нас баралт ба вакцинжуулалтын хооронд ямар нэгэн хамаарал байгаа эсэх, эсвэл үхлийн шалтгаан цэвэр тохиолдол байв уу гэдгийг тодруулах шаардлагатай” гэх байр суурийг илэрхийлсэн байна.
Тус улс өнгөрөгч арванхоёрдугаар сарын 27-ноос эхлэн үндэсний дархлаажуулалтын хөтөлбөрөө хэрэгжүүлж эхэлсэн бөгөөд нийслэл Осло хотын ахмадын асрах газрын оршин суугчид хамгийн түрүүнд вакцинд хамрагдсан юм. Өнөөдрийн байдлаар тус улсад ойролцоогоор 25 мянга гаруй иргэн вакцинд хамрагдсан байна.
Эх сурвалж: legemiddelverket.no, eurnews, unian.info
