Дэлхийд нэр хүнд бүхий “Time” сэтгүүлийн редакц жил бүр салбартаа манлайлж буй хамгийн нөлөө бүхий арван залуу зүтгэлтнийг танилцуулдаг уламжлалтай билээ. Энэ жилийн хувьд орон гэргүй цагаачаас “YouTube”-ын алдартан болсон нэгнээс эхлээд урлаг, улс төр, цахим спорт, нийгмийн сайн дурын идэвхтнүүд энэ жагсаалтад багтсан байна.
Өнгөрсөн жилийн хувьд Францын хөлбөмбөгч, дэлхийн аварга Килиан Мбаппе, Өмнөд Солонгосын хөвгүүдийн “BTS” хамтлаг, Америкийн “R&B” дуучин “The Weeknd” болон Ариана Гранде нар ирээдүй цагийн манлайлагчдаар нэрлэгдэж байв. Ингээд энэ жилийн жагсаалттай танилцъя.
1. Грета Тунберг
Дэлхийн цаг уурын өөрчлөлттэй тэмцэх үйлсэд дэлхийн олон залуусыг идэвхийлэн уриалж буй 16 настай Швед охин тэрээр үүнээс гадна энэ жил Нобелийн энх тайвны шагналд нэр дэвшээд байна.
2. Тесса Томпсон
Америкийн жүжигчин, дуучин, хөгжмийн зохиолч тэрээр энэ жил 35 настай бөгөөд арьс өнгөөр ялгаварлан гадуурхах үзлийн эсрэг хүчтэй тэмцэгч юм. Түүнийг Марвелийн бүтээл болох “Thor:Ragnarok”, “Avengers: Endgame” кинонуудад бүтээсэн Валькир гэх супер баатрын дүрээр болон “Creed” киногоор нь сайн мэдэх билээ.
3. Тундэ Уаи
Нигерээс гаралтай тэрээр анх 16 насандаа шинжлэх ухааны бакалаврын зэрэгт суралцахаар АНУ-д ирсэн байна. Амьдралаа залгуулахын тулд ресторануудад цагийн ажил хийж эхэлсэн тэрээр өөрийн тогоочийн авьяасыг нээн илрүүлж. Өдгөө хэд хэдэн дээд зэрэглэлийн ресторан эзэмшиж, төрөлх улсынхаа хоол болон соёлыг олон улсад амжилттай сурталчилж байна.
4. Рамла Али
Сомали улсаас гаралтай мэргэжлийн боксчин тэрээр 2019 онд Африкийн бүсийн аварга болсон бөгөөд 2018 онд “nike” брэндийн онцлох тамирчин болсон юм.
5. Этан Линдэнбергэр
Түүнийг хүүхэд байхад нь ээж нь буруу мэдээлэлтэй байсны улмаас нэг ч удаа вакцин хийлгээгүй байна. Харин Этан насанд хүрмэгцээ өөрийн вакцин хийлгэх эрхээ эдэлж, бусдад зөв мэдээллийг түгээх болсон юм. Түүний “reddit”цахим форумд өрнүүлсэн хэлэлцүүлэг нь маш олон хүнд хүрч тэрээр өнгөрсөн онд АНУ-ын Сенатын сонсголд хүртэл уригдаж үгээ хэлсэн байна.
6. Ким “Geguri” Сэ Ёон
Өмнөд Солонгосын цахим спортын тамирчин тэрээр “Overwatch” тоглоомын анхны эмэгтэй олон улсын мэргэжлийн тамирчин юм. Түүнийг өнгөрсөн жил “hack” ашиглан булхайцсан гэж бусад тамирчид болон үзэгчид үзсэн бөгөөд хэрвээ тэр хуурайгүй гэдгээ баталж чадаагүй бол бүх насаараа мэргэжлийн тэмцээнд оролцох эрхээ хасуулах байсан юм.
7. Дина Эл Вэдиди
Египетийн дуучин, хөгжимчин, хөгжмийн зохиолч, жүжигчин тэрээр өөрийн уламжлалт соёлыг орчин цагийн өнгө аястай хослуулан улсаа амжилттай сурталчилж байна.
8. Давид Миранда
Өдгөө 34 настай Бразилын сэтгүүлч, улс төрч тэрээр Рио Де Жанейро хотын зөвлөлийг тэргүүлж байна.
9. Росалиа
Испанийн дуучин, ая зохиогч, жүжигчин тэрээр өнгөрсөн онд “Grammy” шагнал хүртсэн бөгөөд Латин Америк дахь хамгийн алдартай эмэгтэй уран бүтээлч аж.
10. Ажэе Нагара “CarryMinata”
Нэгэн цагт орон гэргүй явсан тэрээр хэдхэн жилийн өмнөөс “YouTube” суваг хөтлөх болсноор өнөөдөр сард 265 үзэгчтэй болсон байна. Тэрээр анх хошин маягийн дуу дуулж интернет орчинг байлдан дагуулсан юм.
