УИХ-ын гишүүн У.Хүрэлсүх Ерөнхийлөгчийн сонгуульд ялснаар парламентын хоёр суудал онгойв. Өмнө нь Д.Сумъяабазар хотын мээр болж, УИХ-ын гишүүнээс чөлөөлөгдсөн юм. Энэ хоёр тойргийн нөхөн сонгууль ирэх намар болно. Хэн хэн нэр дэвших вэ гэсэн таамаг одооноос яригдаж эхэлжээ.
Сонгинохайрхан дүүргийн 28 дугаар тойрогт Ерөнхийлөгч асан Н.Энхбаяр өөрийн хүү Э.Батшугарыгаа МАН-аас нэр дэвшүүлэхээр сойж байгаа. Тэрбээр намаа МАН-д нэгтгэсний цаана энэ зэргийн тохироог хийж таарна. Тус тойрогт АН-аас халаагаа өгч буй Ерөнхийлөгч Х.Баттулга нэр дэвших болов уу. Ингэхийн тулд тэрбээр эхлээд АН-ыг атгандаа оруулах байх. Сонгинохайрханы нөхөн сонгуулийн гол тулаан ийм хоёр нэр дэвшигчийн дунд өрнөх магадлалтай. Хэрвээ Сонгинохайрханы нөхөн сонгуульд Х.Баттулга нэр дэвших юм бол Н.Энхбаяр хүүгээ тэгж барын аманд тавьж өгөхгүй, харин МАН-ын генсек болгох тохироо хийхээр тооцоолж суугаа гэдгийг улс төрийн хүрээнийхэн ярьж байна.
Тэгвэл Хэнтийн 18 дугаар тойрогт МАН-аас Н.Энхбаяр өөрөө нэр дэвшин өрсөлдөнө. Ийм хөзөр экс Ерөнхийлөгчийн халаасанд бэлээхэн явсан байж таарна. Н.Энхбаяр нэр дэвшсэн тохиолдолд сонгогдох магадлал өндөр. 2020 оны УИХ-ын сонгуулиар тэрбээр Хэнтийн тойрогт ихээхэн ач холбогдол өгч өөрөө биечлэн тойрсон. Ээжийнх нь нутаг учир Хэнтийчүүд түүнд элэгтэй. Энэ хувилбар үнэн болж таарвал Хэнтийн нөхөн сонгуульд АН-аас Э.Бат-Үүл нэр дэвшиж магадгүй. Гэхдээ энэ нь АН хоёр хагарсан асуудлаа шийдэж, эв зүйдээ орж чадах эсэхээс шалтгаална. Учир зүйгээ олохгүй бол саяын Ерөнхийлөгчийн сонгуулийнх шиг хоёр тусдаа нэр дэвшигчид тодруулаад давхиж байхыг ч үгүйсгэхгүй.
Ямартай ч эрх баригч МАН-д ирэх намрын нөхөн сонгууль хүртэл эрх мэдлийн дахин хуваарилалт явагдана. МАХН-аа татан буулгаж, ирж нэгдсэн Н.Энхбаяр, МАН-д нөлөөгөө алдаагүй Сү.Батболд гээд хоёрдугаар ээлжийнхэн хоолондоо орохоор түмпэн, шанагаа нүдээд эхэлжээ.
,Эх сурвалж: Elive.mn
