Үнэн юм үнэнээрээ сайхан л даа. Женкодоо атгуулаад живж байсан парламент одоо Оюун-Эрдэнэдээ олзлуулаад орилоод хэвтэж байгаа шүү дээ. Монголын парламентийг ганц хоёрхон олигархи, эсвэл тэдний сайн дүү, сайвар цүнх баригч нар жолоодох болсон нь үнэн. Бас урд, хойд хөршөөс чигтэй уламжлалт ах нар нь хошуу билүүдэж, хуруу хөдөлгөж байдаг нь ч үнэн. Оюун-Эрдэнийн ороо бусгаа “шударга үнэн” одоо үнэ цэнэтэй байхаасаа өнгөрсөн.
Амарбаясгалангийн аргатай, агуулгатай менежмент одоо нийгмийн таазанд тулчихаад, нэр хүнд авчрахаа байсан. Сумъабазарын суга хуга шунал одоо сул өвс шиг шатахад бэлэн болсон, Нямбаатарын цээжилсэн, цэртэйгээ нулимсан хуулиуд одоо итгэл төрүүлэхээ байсан. Ингээд бодохоор УИХ 152-уулаа болно гэхээр уур хүрнэ, уцаар төрнө. Гэхдээ энэ ороо бусгаа, олзны их, олбог суудлын мөнхөд дурладаг бацаанууд зүтгүүлээд байгаа гэдэг утгаар нь 152 гишүүний асуудлын эсрэг би бол зогсохгүй. Яагаад гээч? Ганц хоёрхон олигархи галзуу мэт авирлаж байгаад л базаж атгаад, бариад хэвтчихдэг парламентаар яах юм?
Женко сүр хүчтэй үедээ Оюун-Эрдэнийг чинь Нямбаатартай нь өрөөндөө дуудаж байгаад гөлөг болгоод, элэгдэж шанаадахаас наагуур элдэвлэж чичрүүлээд гаргадаг байсан гэдэг шүү дээ. За тэгээд дотоожтой бичлэг төдийд нам базуулж намба алддаг аймхай хэрнээ архичин, шоучин гишүүдтэй байсаар байгаа тохиолдолд Монголын парламент ганц хүүхний дотоожинд, ганц сайн ахын сөгнөсөн хундаганд л багтаад гөлөлзөж байдаг биз дээ? Үүний цаана явдал суудлаар нь барьцаалж байгаад ямар хууль батлуулж, ямар лиценз залгиж, ямар хууль бус наймаа хийж байдгийг бид мэдэхгүй.
Төрийн ажил анхан шатнаасаа алдрын дээд оргил хүртлээ ямар заналхийлэл, хуйвалдаан дунд явагддаг болсныг Зам тээврийн яамны үүдэнд нэгийгээ зодоод алчихсан хэрэг, харсаар байгаад алуулсан түшмэлүүд, АН-ын дарга болохоор өндөр төвшинд яригдаж байсан Батхүү гишүүн ордонд амьд ороод ачуулаад гарсан хэрэг, Амар зочид буудалд байрлаж байгаад баригдсан, компьютер, гар утсаар бүрэн тоноглосон 800 хятадын хэрэг…гэхчлэн нотлох нотолгоо олон доо. Одоо тэр Орос, Хятад, Америкийн тагнуул энэ тэр чинь дүүрсэн хорвоо, захын савхины наймаачин наад парламентийг чинь атгаад, алмас царайлаад хэвтэж байдаг болсон.
Энэ тэгээд ардчилсан парламент юм уу, монголчуудын хүссэн төр юм уу? Энэ тохиолдолд УИХ-ын гишүүдийн тоог 152 болгохыг дэмжинэ. Энэ 76 мануухайнаас чинь залхаж байна. Дахиад л энэ хүмүүс, эсвэл эдний цүнхний хүмүүс дараагийн парламентийг бүрдүүлэхээс айж, ичиж, тэвчээр алдарч байна. 152 гэдэг бол энэ эгзэгтэй эргэлтийн үед Монголын парламентад салхи оруулах монгол залуусын тоо, боломж, орон зай шүү.
МАН Сү.Батболдын үед сонгуулийн холимог тогтолцоог зүтгүүлсээр байж батлаад, тэр үедээ буюу 2012 оны сонгуульд ялагдал хүлээсэн байдаг. Тэгэхдээ тэр үеийн парламент түүхэндээ хамгийн олон буюу таван намын бүрэлдэхүүнтэй болж, хоёрхон намд хормойгоо дэвсдэг, хоолоо булаалгадаг зуршилд үзэгдэл авчирч байлаа. Харин тэр холимог тогтолцоог хойш татаад байгаа жагсаалтаар гишүүн болдог аргачлал, шалгуурт сайтар хяналт тавих хэрэгтэй. Улс төрийн намууд ингэтлээ ялзарчихаад байгаа тохиолдолд жагсаалтаар нөгөө Нямдорж, Женко Батлага, Зика Энхболд, Ми.Энхболд энэ тэр чинь буцаад тооноор ороод ирэх нэг эрсдэл бий. За тэгээд юу гээч, 152 гэдэг тоо бол залуусын, бие даагчдын, шинэ тутам намуудын боломж шүү.
Монголын парламент олон өнгөтэй, олон өнцөгтэй, булан тойроод дотоожны бичлэгээр үнэлэгддэггүй, ширээ тойроод хундаганы үгэнд багтдаггүй баймаар байна. Үгүй бол тэгээд Женкодоо атгуулаад жижгэрээд хэвтчихдэг, Оюун-Эрдэнэдээ олзлуулаад орилохоосоо ч айдаг парламентийг ардчилсан арьс нөмөрсөн хаант засаглал л гэж би хэлнэ, өөр арга үгүй. Монголчууд хэчнээн ядарсан ч өнөөдөр 152 гишүүний цалингаар хотойхдоо тулаагүй байна, 152 толгойн үзэл бодол, боловсрол, үнэн байдлаар л дутаж байна даа. Энэ хуулийг нь урагш түлхээд, энэ сонгуульд залуу, боловсролтой, нам бус шинэ үеийнхнийг, үр хүүхдээ нэр дэвшүүл, үзээд гараад иртэл нь өрсөлд. Тэгж байж парламентийн цус ойртолтыг задална!
